सिरसाव |
राज्य शैक्षणिक संशोधन व प्रशिक्षण परिषद महाराष्ट्र पुणे संचालक डॉ राहुल रेखावार यांच्या संकल्पनेतून यंदा प्रथमच हॅकेथॉन या स्पर्धात्मक कार्यक्रमाचे आयोजन शैक्षणिक वर्ष २०२४-२५ मध्ये करण्यात आले होते. आपल्या परिसरातील विशिष्ट समस्या सोडवण्यासाठी व नवीन संधी ओळखण्यासाठी स्पर्धक एकत्र येऊन एकमेकांशी संवाद साधतात व नवनिर्मितीचे सादरीकरण करतात.
हॅकेथॉनने मानवी कौशल्य (6C )या पंधरा विषयांचा समावेश करून त्यावर आधारित राज्य प्रदर्शनाचे आयोजन दिनांक १२ मार्च 2025 रोजी पुणे येथील बालेवाडी स्टेडियम येथे करण्यात आले होते महाराष्ट्रातील ३६ जिल्ह्यातून ८८ स्पर्धकांची निवड करण्यात आली होती. परंडा तालुक्यातील जिल्हा परिषद प्रशाला सिरसाव येथील सातवीच्या विद्यार्थिनी वैष्णवी प्रशांत नवले व मानसी अविनाश गावकरे या विद्यार्थिनींचा या स्पर्धेत राज्यात तृतीय क्रमांक आला आहे.
या स्पर्धेत त्यांच्या प्रकल्पाचा विषय होता 'भरडधान्य'. यासाठी त्यांना त्यांच्या विज्ञान शिक्षिका श्रीमती दिपाली सबसगी यांनी मार्गदर्शन केले. आपल्या परिसरातील विद्यार्थ्यांचे आरोग्य सुदृढ व निरोगी कसे राहील यासाठी या शिक्षिका नेहमी प्रयत्नशील असतात. परिसरातील विद्यार्थ्यांनी जंक फूड्स टाळून आरोग्यदायी पौष्टिक पदार्थ खावेत हा उद्देश डोळ्यासमोर ठेवून मॅडम व विद्यार्थिनींनी हा प्रोजेक्ट तयार केला यामध्ये भरड धान्याच्या विविध रेसिपीचे बुकलेट या विद्यार्थिनींनी बनवले आहे तसेच पौष्टिक व चविष्ट असा मिलेटबार, नाचणी वडी, मिक्स धान्याची चकली वगैरे असे भरपूर पदार्थ व त्यांचे सादरीकरण त्यांनी राज्याच्या स्पर्धेत केले तसेच भरडधान्ययुक्त ताट, रेसिपीजचे झाड, भरड धान्य उतरंडी, भरडधान्याची बैलगाडी हे सर्व साहित्य त्यांच्या प्रोजेक्टमध्ये समाविष्ट होते.
पारंपारिकतेला त्यांनी आधुनिक तंत्रज्ञानाचीही जोड दिली त्या रेसिपीचे क्यूआर कोड तयार केले त्यामुळे ते स्कॅन करून सर्वजण त्या पदार्थांची कृती व साहित्य पाहू शकले अशा या विद्यार्थिनींचे व त्यांना मार्गदर्शन करणाऱ्या दिपाली सबसगी मॅडमचे शाळेतून,संपूर्ण गावातून, तालुक्यातून तसेच जिल्ह्यातून कौतुक होत आहे. याकामी त्यांना शाळेतील मुख्याध्यापक व सर्व शिक्षकांचे सहकार्य लाभले.
मा. राहुल रेखावार संचालक राज्य शैक्षणिक व संशोधन परिषद महाराष्ट्र , मा.महेश पालकर संचालक योजना विभाग, मा. कृष्णकुमार पाटील संचालक बालभारती पुणे, मा. हिरालाल सोनवणे संचालक क्रीडा विभाग पुणे, मा. डॉ. कमलादेवी आवटे उपसंचालक राज्य शैक्षणिक व संशोधन परिषद पुणे या मान्यवरांच्या हस्ते सन्मानचिन्ह व प्रशस्तीपत्र देऊन गौरविण्यात आले.
0 Comments