मुंबई - शिवसेना नेत्या उर्मिला मातोंडकरांनी काँग्रेसच्या निवडणूक निधी खात्यातून २० लाख रुपये मुख्यमंत्री सहायता निधी अर्थात सीएम रिलीफ फंडाला दिल्याचे कळते. लोकसभा निवडणुकीच्या प्रचारासाठी काँग्रेसकडून उर्मिला मातोंडकरांना ५० लाखांचा निधी देण्यात आला होता. त्यातील २० लाख रुपये त्यांनी मुख्यमंत्री सहायता निधीला मदत म्हणून दिले आहेत. या निधीवरून आता चर्चा सुरू झाली आहे. या चर्चांवर ऊर्मिला मातोंडकरांनी प्रतिक्रिया दिली आहे.
एक वर्षापूर्वी उर्मिला यांनी काँग्रेसचा राजीनामा दिला. त्यानंतर मागील महिन्यात त्यांनी शिवसेनेत प्रवेश केला. दरम्यान, २०१९ लोकसभा निवडणुकीत उर्मिला यांना काँग्रेसने उमेदवारी दिली होती. निवडणूक आयोगाच्या नियमांप्रमाणे उर्मिला यांनी निवडणूक खर्चासाठी कांदिवलीतील सार्वजनिक बँकेत संयुक्त खाते उघडले होते. महाराष्ट्र काँग्रेसचे महासचिव अशोक सुत्राळे हे या संयुक्त खात्याचे खातेधारक होते. निवडणूक आयोगाने प्रत्येक उमेदवाराला खर्चाचे बंधन घालून दिलेले होते. उमेदवाराला ७० लाखांपर्यंत खर्च करण्याची मर्यादा ठरवून दिलेली होती. त्याप्रमाणे महाराष्ट्र काँग्रेसने एप्रिल २०१९ मध्ये ऊर्मिला यांच्या संयुक्त खात्यात ५० लाख रुपये जमा केले होते.
त्यांनी या खात्यातून निवडणुकीसाठी ३० लाख रुपये खर्च केले होते. तर ऊर्मिला यांनी खात्यात शिल्लक असलेले २० लाख रुपये जुलैमध्ये मुख्यमंत्री सहायता निधीला मदत म्हणून दिले. काँग्रेसचा राजीनामा दिल्यानंतर ही मदत देण्यात आली. त्यामुळे याची चर्चा रंगली.
याबाबत खुद्द ऊर्मिला मातोंडकरांनी आपली भूमिका स्पष्ट केली आहे. त्या म्हणाल्या, 'सीएम रिलीफ फंडाला दिलेल्या मदतीवरून काही लोक कथा रचत आहेत. परंतु लॉकडाऊनच्या काळात काँग्रेस प्रदेशाध्यक्ष बाळासाहेब थोरात यांच्या परवानगीनेच हे पैसे मुख्यमंत्री सहायता निधीला दिलेत. कोरोनाच्या काळात लोकांच्या कल्याणासाठीच मी या पैशाचा वापर केला.'
0 Comments